Бог - наша сіла

"Не хачу бачыць смерці хлопчыка", - сказала Агар, - "і заенчыла, і плакала" (Быц. 21:16). Пасля таго, як Абрагам выгнаў Агар і яе сына Ізмаіла, яны шмат дзён блукалі ў пустыні Вірсавіі. У іх скончылася вада, і становішча стала безнадзейным. Яны апынуліся паміж жыццём і смерцю.

Таксама, як Агар, мы, здараецца, зведваем такія часіны, калі жыццёвыя цяжкасці захлістваюць нас. У гэткіх бядотах мы можам цалкам даверыцца Госпаду і паўтарыць услед за псальмістам: "Бог нам прыпынак і сіла, магутная ў бядзе ўспамога" (Пс. 46:2).

МАЛІТВА ДАСПАДОБЫ БОГУ

Бог хоча, каб мы звярталіся да Яго ва ўсялякай патрэбе: "І кліч Мяне ў дзень няшчасця: Я спасу цябе, і славіць будзеш Мяне" (Пс. 50:15). Аднак, у Сваёй любові Бог жадае, каб мы казалі Яму не толькі пра нашы патрэбы, але і пра ўсё, што маем у думках.

Як любячыя бацькі ўзрушваюцца, калі іх дзеці дзеляцца з імі сваімі турботамі і радасцямі, гэтаксама і Бог вельмі цешыцца, калі мы раімся з Ім аб усім, што ляжыць у нас на сэрцы. Заўсёды ў малітве мы можам адкрываць свае сэрцы Богу і казаць Яму пра ўсё! Гэткая адкрытасць даспадобы нашаму Нябеснаму Айцу.

МАЛІЦЕСЯ З УПЭЎНЕНАСЦЮ

Калісьці еўрапейцы досыць часта расказвалі гісторыю пра жыхароў адной краіны, якія рыхтаваліся да каранацыі іх валадара. Натоўпы людзей выйшлі на вуліцы, каб убачыць працэсію, у якой ішоў новы кароль. Нейкі 12-гадовы хлопчык стаў прабірацца праз натоўп. Урэшце ён дасягнуў варты, і хацеў прайсьці далей. "Сюды нельга! - спынілі яго вартавыя. - Хіба ты не ведаеш, што гэта кароль?" На што хлопчык адказаў: "Мабыць, гэта і кароль, але ён таксама і мой тата!"

Мы можам набліжацца да Божага нябеснага трона з упэўненасцю гэтага 12-гадовага хлопчыка, які ішоў прама да свайго бацькі, караля. Праз Ісуса Хрыста мы з'яўляемся ўсыноўленымі дзецьмі Божымі (Гал. 4:4-5). Божае літасцівае ўсынаўленне дае нам смеласць маліцца. "Бо вы не прынялі духа няволі ізноў на страх, але прынялі Духа ўсынаўлення, у Якім і клічам: Авва, Ойча!" (Рым. 8:15).

ІСУС - ШЛЯХ

Ісус дае нам магчымасць размаўляць з Нябесным Айцом. Ён знішчыў сцяну грэху, што стаяла паміж намі і Богам. Ён дае нам магчымасць прыходзіць да Творцы свету нават з найменшымі нашымі турботамі. Аўтар Ліста да Габрэяў выразна тлумачыць, што Ісус, "падобна нам, дазнаў ва ўсім спакушэння", і таму Ён разумее нас (Габр. 4:14-16). Кожны раз, маючы праз малітву гутарку з Богам, мы можам бачыць Яго любоў і міласэрнасць у Ісусе, і гэта надае нашай малітве радасць. "Радуйцеся заўсёды ў Госпадзе; і зноў кажу: радуйцеся!.. Не турбуйцеся ні аб чым, але заўсёды ў малітве і благанні ПАДЗЯКАЙ няхай адкрываюцца просьбы вашы перад Богам" (Філ. 4:4, 6).

ДОБРАЯ ВЕСТКА!

Гэты выпуск ДОБРАЙ ВЕСТКІ прысвечаны шэрагу ключавых біблейскіх вучэнняў, што датычаць малітвы. Ад гэтых вучэнняў Госпад накіруе нас да Свяшчэннага Пісання і павядзе па яго старонках. Пісанне адкрые нам Божую волю наконт Яго дару малітвы. Калі дзень у дзень мы будзем узносіць богаўгодныя малітвы, што грунтуюцца на Божым жывым Слове, Бог абновіць нашы розумы і дасць нашым сэрцам шчасную ўпэўненасць, што з Богам "усё магчыма" (Мац. 19:26).

"А Таму, Хто дзеючаю ў нас сілаю можа зрабіць шмат болей за ўсё, чаго мы просім або ў думках маем, Таму слава ў Царкве ў Хрысце Ісусе, на ўсе роды на век вякоў. Амін" (Эф. 3:20-21).

Каб азнаёміцца з астатнімі артыкуламі гэтага нумара, а таксама прачытаць іншыя нумары, падпішыся на ДОБРУЮ ВЕСТКУ*
*Вы будзеце атрымліваць новыя выпускі часопіса. Мы не гарантуем адпраўку выпускаў, выдадзеных раней.