Бог дае надзею

Праз забойства свайго брата Авеля Каін аддзяліўся ад сваёй сям'і, а таксама аддаліўся ад Бога. У 4-м раздзеле кнігі Быццё мы чытаем аб тым, як Каін "пайшоў ад аблічча Гасподняга". Ён стаўся "выгнаннікам і валацугаю на зямлі".

Дагэтуль безліч людзей у свеце застаюцца аддаленымі ад Бога. Напрыклад, новыя дзяржавы, да ўтварэння якіх спрычыніўся распад атэістычнага Савецкага Саюза, атрымалі ў спадчыну хаос і блізу 300 мільёнаў жыхароў, якія не ведаюць, у што верыць. Многія з іх зараз, як і Каін калісьці, з'яўляюцца духоўнымі выгнаннікамі і валацугамі, адлучанымі ад Бога.

У апошнія дзесяцігоддзі мільёны людзей у Заходняй Еўропе, у Злучаных Штатах і ў Канадзе з вялікім захапленнем прынялі ідэі матэрыялізму. Аднак, нягледзячы на ўвесь матэрыяльны дабрабыт і заможнасць у заходніх краінах, большасць людзей, што жывуць там, маюць пустэчу ў душах, гэтаксама, як і жыхары былога СССР. І адны і другія далучыліся да Каіна і яго сям'і ў іх духоўных блуканнях і выгнанні.

Асноўнай прычынай гэткай пустэчы ў душах і духоўных блуканняў не з'яўляюцца ані брак матэрыяльных каштоўнасцей, ані недахоп дабротаў жыцця. Сапраўдная прычына духоўнай пустэчы заключаецца ў тым, што хаця мільёны людзей сёння і шукаюць дарогу да храма, але спрабуюць знайсці адказ на пытанне аб сэнсе жыцця, зыходзячы з уласных меркаванняў і ўяўленняў, а не з Божых азначэнняў. У цяперашні час д'ябал спакушае многіх да веры ў тое, нібы яны здольныя знайсці сэнс жыцця і задаволіць свае духоўныя патрэбы сваімі ўласнымі намаганнямі.

МІЛЬЁНЫ БЛУКАЮЦЬ ...І ШУКАЮЦЬ

У канцы 1994 г. амерыканскі часопіс "Ньюзуік" апублікаваў звесткі аб тым, што больш за 58 працэнтаў насельніцтва ЗША шукаюць "глыбокіх рэлігійных пачуццяў". У пэўным сэнсе, падобныя духоўныя блуканні і пошукі, як на Усходзе, гэтак і на Захадзе, вартыя ўхвалы. Свяшчэннае Пісанне заклікае: "Шукайце Госпада, як можна знайсці Яго" (Іс. 55:6). Тым не менш, пошукі рэлігійных "пачуццяў" не з'яўляюцца поўным адказам на гэты заклік. Уважаючы рэлігійныя перажыванні за найвышэйшую духоўную мэту, урэшце можна спазнаць не толькі расчараванне, але і асуджэнне на вечныя пакуты. Усялякія эмацыянальныя пачуцці, у тым ліку і рэлігійныя, доўжацца нядоўга: сёння яны ёсць, а назаўтра мінаюць.

ВАШЫ ПОШУКІ МОГУЦЬ СКОНЧЫЦЦА

Дзеля таго, каб перасцерагчы людзей ад гэткага трагічнага расчаравання, Бог звяртаецца да ўсіх праз прарока Амоса, кажучы: "Шукайце Госпада - і будзеце жыць" (Ам. 5:6). Гэта значыць, Бог не толькі з'явіў Сябе людзям у Хрысце (Габр. 1:2), але і ўзяў на Сябе ініцыятыву, каб Самому знайсці нас. Ён таксама залучыў нас да новых адносін з Сабою ў Ісусе Хрысце (2 Кар. 5:19). Апостал Паўла тлумачыць, як мы, грэшнікі, можам мець новыя, поўныя радасці, стасункі з Госпадам (Філ. 3:8-9). Гэта значыць, мы павінны быць зусім упэўнены, што зможам з'явіцца перад пасадам суду Божага абсалютна праведнымі. Гэтая праведнасць - не штосьці заслужанае ці здзейсненае намі самімі. Праведнасць, якой Бог збаўляе нас, - гэта заслужаная Хрыстом дасканалая праведнасць, якую Бог з ласкі Сваёй дорыць нам праз веру (Рым. 4).

ДЗІЎНАЯ І ЗБАЎЛЯЛЬНАЯ ЛАСКА БОЖАЯ

Бог абвяшчае нас "праведнымі" перад Сабою, дзякуючы заслугам Хрыста, і таму нам няма больш патрэбы падобна да Каіна бязмэтна блукаць у роспачы. У Хрысце мы нанова злучаемся з Богам - не праз зменлівыя рэлігійныя пачуцці, а праз Яго трывалы вечны план прымірэння. Бог абвяшчае нас праведнымі таму, што ЁН міласэрны, і таму, што Хрыстос - наш Збаўца. Такім чынам, мы маем вялікую радасць нават у найбольш цяжкія часіны свайго жыцця. Вынік цудоўнага злучэння з Богам св. Паўла апісвае гэткімі словамі: "Дык, апраўдаўшыся вераю, мы маем мір з Богам" (Рым. 5:1).

ПОШУКІ СКОНЧАНЫЯ!

Цяпер вы не маеце прычын, каб, падобна да Каіна, працягваць свае духоўныя блуканні. Злучыцеся з Богам, Які дае прымірэнне праз Сваю любоў, што з'явіў Ён у Сваім Сыне Ісусе Хрысце (2 Кар. 5:19). Уласнымі намаганнямі вы не здолееце здабыць мір. Адзіная ваша надзея заключаецца ў тым, што, не зважаючы на вашы грахі і бездапаможнасць, Бог з ласкі Сваёй "абвeсціць" вас праведнымі. Бог заўжды дае надзею! З усяго таго, што толькі калі-небудзь вы пачуеце, гэта - найвялікшая Добрая Вестка. Калі вы вераю прымеце яе ад Бога, гэта абавязкова пераменіць ваша сэрца і ператворыць ваша жыццё. Добрая вестка аб ласцы Божай таксама дасць вам здольнасць з упэўненасцю жыць у гэтым свеце. І, самае галоўнае, гэтая добрая вестка з'яўляецца вашым збавеннем на векі вечныя.

Гэты выпуск нашага часопіса засяроджвае ўвагу на Божай добрай вестцы аб апраўданні з ласкі праз веру "...ўсіх веруючых; ...[яны]... апраўданыя дарма ласкай Ягонай, адкупленнем, што ў Хрысце Ісусе" (Рым. 3:22, 24). Паверыў Абрагам у Бога, і гэта "ЗАЛІЧАНА ЯМУ ЗА ПРАВЕДНАСЦЬ. Дый не ў адносінах да яго аднаго напісана, што залічана яму, але і ў адносінах да нас: залічана будзе і нам" (Рым. 4:22-24).

ГОДЗЕ БЛУКАЦЬ... МАЙЦЕ МІР З БОГАМ - РЫМ. 5:1

Годзе бязмэтна блукаць, як гэта рабіў Каін. Замест гэтага паспавядайце свае грахі перад Богам. Духам Сваім Святым Бог упэўнівае ваша сэрца ў адпушчэнні грахоў, што ўжо было заслужана для вас смерцю Ісуса на крыжы. Дзякуючы адкупленню, здзейсненаму Хрыстом на крыжы, Бог у Хрысце даруе вам грахі (1 Ян. 1:9). Зважаючы на тое, што ўчыніў Хрыстос дзеля вас, Бог "абвяшчае" вас праведнымі перад Сабою. "Бо Таго, Хто грэху не ведаў [Ісуса], Ён зрабіў за нас грэхам, каб мы ў Ім сталіся праведнасцю Божай" (2 Кар. 5:21). Гэта - добрая вестка для вас. Блуканні могуць скончыцца, і вы маеце магчымасць пазбавіцца пустэчы ў сваёй душы. У Хрысце вы пакліканыя вярнуцца дадому, да свайго нябеснага Айца (Лук. 15:32). Не марудзьце! У Хрысце пагадзіцеся з Богам! Майце з Ім мір! (Рым. 5:1).

Каб азнаёміцца з астатнімі артыкуламі гэтага нумара, а таксама прачытаць іншыя нумары, падпішыся на ДОБРУЮ ВЕСТКУ*
*Вы будзеце атрымліваць новыя выпускі часопіса. Мы не гарантуем адпраўку выпускаў, выдадзеных раней.