У дні Ісуса мытнікаў лічылі самымі нікчэмнымі падонкамі грамадства. Ніжэй за іх не было нікога. Таму калі Ісус паклікаў Мацвея, пагарджанага мытніка, ісці следам за Ім, Мацвей узрушыўся і ўсцешыўся. Ён не мог утрымаць у сабе радасць ад добрай весткі Ісуса. Наадварот, як сведчыць Біблія, Мацвей (таксама вядомы як Левій) адчыніў свой дом і падрыхтаваў вялікі банкет для Ісуса (Лук. 5:29).

ДАРАВАННЕ БОЖАЕ ПАШЫРАЕЦЦА ПРАЗ ВАС СЯРОД ВАШЫХ БЛІЗКІХ

Гэта не было вячэрай, падчас якой Ісус мог бы пагутарыць з Мацвеем сам-насам. Не! Гэта была бяседа, на якую Мацвей запрасіў сваіх сяброў і знаёмых - такіх самых грэшнікаў, якім быў ён сам. Мацвей хацеў, каб дараванне прыйшло не толькі да яго, але праз яго і да ягоных сяброў і таварышаў. Радасць даравання, падобная да той, якую адчуў Мацвей, гэта не проста эмацыянальны ўздым. Божае дараванне кранае цалкам нашу душу і наша цела: "Ён паслаў Сваё Слова і вылечыў іх" (Пс. 107:20).

Нават медыкі звярнулі ўвагу на тое, які дабратворны ўплыў робіць дараванне на фізічны стан грэшнікаў. Мічыганскі інстытут сацыяльных даследаванняў працуе з навукоўцамі з 60 краін свету. Больш чым за 50 гадоў гэты інстытут апублікаваў нямала сенсацыйных вынікаў міжнародных доследаў. Але не было больш дзіўнага адкрыцця, зробленага даследчыкамі інстытута, чым выяўленне таго факта, што людзі, якія адзначаюцца лепшым здароўем - гэта тыя, хто даруе другім.

Навукоўцы вельмі здзівіліся, калі ўбачылі, што ваша здароўе ў вялікай ступені залежыць ад таго, ці даруеце вы іншым людзям - свайму мужу ці жонцы, сваім бацькам, дый усім тым, хто, на ваш погляд, пакрыўдзіў вас, ці з кім вы не маеце згоды.

Такім жа чынам многіх хрысціян здзіўляе, што Бог дае асаблівыя дабраславенні не толькі тым, хто пазнаў Яго дараванне ў Хрысце, але і тым, хто дазваляе жыватворнаму дараванню Божаму распаўсюджвацца ПРАЗ іх далей, аднаўляючы іх адносіны з другімі людзьмі. Менавіта гэта і адбылося з Мацвеем (Левіем).

Гэты выпуск ДОБРАЙ ВЕСТКІ змяшчае цудоўныя карціны і ўгрунтаваныя на Бібліі тлумачэнні таго, як Бог у Хрысце ўжо дараваў вам. Таксама (мы спадзяемся, гэта будзе карысна для вас) у дадзеным выпуску адмысловае значэнне ўдзяляецца Божаму вучэнню аб тым, як Ён дае Свае асаблівыя дабраславенні вам, калі Яго дараванне ў Хрыстовай крыві праз вас пашыраецца ў жыццях людзей, у стасунках з якімі вы калісьці мелі цяжкасці і нязгоду. "І не смуціце Святога Духа Божага, Якім вы запячатаны на дзень адкуплення. Усякая горыч, і ярасць, і гнеў, і крык, і лаянка няхай будуць аддалены ад вас - разам з усім благім; будзьце ж адзін да аднаго добрымі, спагадлівымі, выбачаючымі адзін аднаму, як і Бог у Хрысце выбачыў вам" (Эф. 4:30-32).

РАЗАМ З ДРУГІМІ ЛЮДЗЬМІ СЛАЎЦЕ БОГА ЗА ДАРАВАННЕ

Як Мацвей, слаўце Бога за дараванне. Запрашайце людзей у царкву - Божы дом, дзе яны змогуць жывіцца Хрыстовым Словам Жыцця (Ян. 6:63). "Не хлебам адным жыць будзе чалавек, але ўсякім словам, выходзячым з вуснаў Божых" (Мац. 4:4). Пакаштаваўшы гэтага Хлеба Жыцця, запрасіце другіх далучыцца да вас і таксама пакаштаваць Божае жыватворнае Слова даравання.

Каб азнаёміцца з астатнімі артыкуламі гэтага нумара, а таксама прачытаць іншыя нумары, падпішыся на ДОБРУЮ ВЕСТКУ*
*Вы будзеце атрымліваць новыя выпускі часопіса. Мы не гарантуем адпраўку выпускаў, выдадзеных раней.